TW/ abuso/ agresion sexual

Siman pasa tabata yena cu noticianan impactante. Lamentablemente mayoria di nan tabata negativo, por lo menos esunnan cu mi a wak anto. Problemanan social ta resalta den noticianan den tur medio y casi un sentimento di desesperacion ta drenta mi curpa. Nos sa cu noticianan negativo ta bende mas cu noticianan positivo y p’esey constantemente prensanan ta skirbi noticianan “malo”, esaki ta loke mi ta celebro ta purba convence mi curason. 

1000 boter? Pakico?

Mi tabata generalisando den e titulo. Mi mester a gara boso atencion di un manera of otro, pasobra no ta solamente Aruba. Practicamente e internet tabata haciendo bromanan relaciona cu abuso sexual desde cu nan a haya e 1000 boter di zeta di baby na Diddy su cas, hunto cu casi 800 dildo.

Chistenan di mal gusto

Sinembargo, mi kier pone enfasis ariba un situacion cu a sosode siman pasa ora cu a interoga un (ex) minister. Despues di interogacion a sigui pa detencion. Nos dushi hendenan di Aruba no a tarda un tiki pa cuminsa cu “memes”  y chistenan ariba medionan social. Esaki ta algo cu mi por a spera. Ban ta serio, nos ta na Aruba. Loke cu mi no tabata prepara p’e ta e bromanan di rape den prison, pasobra esaki ta loke cu e ta. Kisas un pildo duro pa guli, pero ora cu bo ta broma cu Diddy, of otro politiconan cu actualmente ta cera na KIA, ta bay coge e (ex) minister den KIA, bo ta haciendo broma di abuso sexual. “That’s f*cked up!”

Kico ta abuso sexual? 

Abuso sexual of agresion sexual ta tur tipo di actividadnan sexual cu ta sosode sin un persona su consentimento.

Abuso sexual ta inclui:

-(Intento di) rape: forsa un persona pa tene relacion sexual contra su boluntad 

-Mishimento sexual: mishi cu un persona di forma sexual sin nan consentimento

-Acoso sexual: haci avancenan of comentarionan sexual indesea cerca un persona.

Consentimento ta di indispensabel. Si un persona bisa “no” of ta dunando indicacion di no kier, esaki ta nifica cu nan no kier participa. Ta importante pa resepta esaki (RAINN, s.f.).

Machismo t’ey

Algun siman atras AweMainta a haci e pregunta si machismo ta creciendo na Aruba. Ami mes no por bisa concretamente si el a subi of baha, pasobra mi falta data. Sinembargo siman pasa e tabata bisto con nos sociedad ta haci chistenan inapropia di rape (abuso y violencia sexual). Machismo t’ey, cu nos kier admiti of no. A bira tempo pa nos bira critico y pensa prome cu nos haci bromanan asina. E (ex) minister kisas no ta bay wak bo comentarionan, pero e conoci di bo ey cu a pasa den abuso sexual, cu ta luchando den silencio pa hopi aña, si lo wak e. Asina chistenan machista, manera rape den prizon, lo sigui contribui na mas stigma rond di abuso sexual di hende homber.

Conclusion

Boso mag di yama mi dramatico (cual mi sa cu mi ta), un “snowflake” of persona sensitivo di generacion di cristal, mi no ta worry. Mi por drumi trankil sabiendo cu mi no ta esun cu ta haci chiste di un topico asina delicado y doloroso. Anto esaki no ta un articulo politico tampoco, dus no ni tribi di haci e articulo aki tocante politikeria.

Mi ta conseha boso wak e video cortico di ‘The Rape Jokes We Still Laugh At’ di ’The New York Times’. Den e video un persona cu a experencia abuso sexual den prizon ta conta su perspectiva. Abuso sexual no ta parti di e castigo ora cu un persona ta cera den prizon y a bira tempo pa nos realisa cu chistenan di rape (den prizon) ta super inapropia y completamente innecesario.