Querido diario,

Papiamento, claro cu si!

Mi sa, e titulo ta zona straño y porta bo ta custuma lesa mi storianan na Ingles, pero e aña aki mi a dicidi di reta mi mes door di skirbi mas contenido na Papiamento. Mi ta bayendo un curso tur diasabra di Papiamento. Ayera mi tanta a keda wak mi straño ora cu mi a bis’e esaki. Si su mirada por a papia e lo a bisa mi esaki: esta un perdida di tempo, ta kico bo por siña nobo di un curso asina? E ora mi a splica mi tanta cu tin hende ta pensa cu nan ta domina Papiamento. Claro cu nos tur por papi’e, mescla cu Ingles, Hulandes y Spaño, pero un frase puro na Papiamento, purba wak si bo ta logra. Mi a splic’e cu pa skirbi’e ta un otro cos. Tin hende nan ortografia ta laga di desea, pero atrobe nos no por culpa niun hende, nos a wordo manca na scol cu un idioma di instruccion cu no ta di nos, casi pone nos kere cu nos ta bobo, pero nos ta inteligente. Mi a cuminsa zona manera un machi mi sa.

Ayo, Maxiboyyy 🙁

E aña a habri keto, aunke ainda mi ta un poco tristo. Max, a bay laga nos net despues di pasco. Mi tabata sa cu esey lo tabata su ultimo pasco, pero nunca mi a pensa cu e lo laga nos prome cu aña a caba. Nos lo haya bo falta, pero nos sa cu bo ta cerca di nos.

It’s Britney, b*tch!

Den e di dos siman di januari mi a caba di lesa The Woman In Me di Britney Spears. E tabata facil pa lesa, den sentido cu e Ingles no tabata complica, pero e contenido tabata rekeri un pauze constantemente. E tabata un buki facil, pero dificil pa lesa. No solamente e detayenan di kico Britney a pasa aden, pero con e tabata sinti na cada momento tabata baha cada bes mas pisa, manera un pildo di multivitamina zuur. E tabata un persona liber, pero encarcela. Mi a tarda tambe pasobra mi tabata keda bay cada rato ariba YouTube pa wak algun video cu Britney tabata referi na dje. No pa mi controla si loke e tabata bisa tabata cuadra, mi no ta e monster di su tata, pero wak su expression y pa recorda mi mes cu algun persona simplemente no tin empatia. Britney a sufri y personanan cu tabata mester a stim’e tabata esun cu mas daño a ocasion’e. Mi definitivamente ta recomenda e buki aki, especialmente na e lolonan cu ta wak Britney straño despues di tur e traumanan cu el a pasa aden. O, anto Justin Timberlake a resulta di ta mesun ‘patan’ cu personahe den Bad Teacher. Serio, f*ck e guy ey.

Boca abou

Mi a bay cuater les di poledance den luna di januari. Mi a cuminsa cu e curso di principiante y mi a dicidi di sigui bay tur siman, un biaha. Mi a gusta, pero tin hopi espacio pa mehora mi mes. Ami nunca lo a imagina di wak mi mes boca abou na final di januari, anto despues di a dal un lunch pisa. Ami no a pensa mi lo tin e curashi ey, ni ora mi tabata na scol basico mi tabata bolter asina.

70

Mi amiganan a logra convence mi pa bay un actividad di carnaval. Esey ta mas sorprendente ainda cu e lesnan di poledance. E ultimo biaha cu mi a bay un actividad di carnaval tabata na 2012, dus mi tabata tin un poco nervioso. El a bay bon, pasobra mi amiganan tin hopi pasenshi. Nan a logra saca mi for di cas y for di zona di confortabilidad. Mi ta kere nan mes no a realisa kico nan a caba di logra.

11 aña pasa caba?!

E siman aki mi a wak un trend, of mas bien un template ariba Instagram cu a hala mi atencion. Na comienso di e aña aki, mi kier a pone un potret di mi di 11 aña pasa. E ta potret di mi ariba bispo di aña den un bisti di payet blauw marino. Ainda mi tin e bisti aki, pero mi chan chan no ta fit mas aden. Pa algun rason, mi ta kere pasobra mi ta verlegen, mi no a pone e potret mas.

Awo pa mi sorpresa e siman aki mi a wak un monton di potret leuk di hendenan ora cu nan tabata tin 21 aña. Ora mi a sinta pens’e mi a realisa cu ami tabata tin 21 aña ora cu mi a saca e potret ey ariba e ultimo dia di 2012. Naturalmente bo lo pensa cu awo ta e momento ideal pa comparti e potret ey toch? Mi a bay busca mas potret di ora cu mi tabata tin 21 aña. Mi a haya un super colorido di ora cu ami y Jason a bay Het Park. Ta bon mes cu e no ta corda su codigo secreto di su Facebook bieuw di fotografia, pasobra ainda e pagina ta ey nan manera 11 aña pasa. Ora mi a wak esun cu mas mi a gusta mi a baha e potret y tabata cla pa pon’e. Mi a cuminsa haci e potret mas grandi y despues mi a para. E no ta cu mi no a gusta e potret mas, djis mi a wak mi sonrisa miho y mi a cuminsa pensa. E tempo, si bo puntra mi, tabata e pio epoca di mi bida.

Mi prome aña na Hulanda, cu un nubia shinishi tristo cu constantemente tabata ariba mi cabes, tur caminda cu mi move y si, te hasta ora cu mi a bay Walibi. Mi tabata hari ariba potretnan, pasobra e tempo ey ainda mi tabata gusta saca potret, pero e no tabata e realidad. Tin ora mi tabata hari asina grandi pa Jason no puntra mi nada, pero mi sa cu e sa cu mi tabata yora casi tur anochi ora cu mi tabata lomba p’e. Mi prome aña na Hulanda casi a kibra mi, eigenlijk mi ta kere un pida di mi a kraak, pero e no a kibra completamente y apesar cu mi tabata wardando e storia aki pa mi autobografia, cada dia mi ta realisa cu nos no por warda. Ora mi tabata mucha mi mama semper tabata bisa mi pa no warda loke mi por haci awe pa mañan. Si un dia mi haya un yiu ami lo bis’e: no warda loke bo mester bisa awe pa mañan. Bo no sa si bo tin mañan y pakico warda pa bisa cosnan importante, cu por haci un diferencia, cu por pone bo sinti miho.

Ora mi tabata sa cu mi lo no bay logra haya e puntonan necesario pa sigui pa di dos aña y pio ainda, nunca mas mi lo tin e oportunidad di por duna historia na scol, cual tabata ful e motibo pa bay studia asina leu na prome luga, mi alma y spirito tabata djis flota rond. Sin sa kico pa haci, kico pa sinti. Ful e experencia di mi prome aña tabata horibel y tin momentonan desagradabel cu ainda mi ta corda manera cu tabata ayera. Nan ta bisa bo mente ta blokia mal recuerdonan, pero mi ta corda algun evento amargo di e tempo ey claramente. Nan cara palido ta wak mi cu nan sonrisa di desaprobacion despues di cada presentacion. Nan comentarionan cu a trapa mi y humilia mi.

Ora mi a pensa bek ariba tur loke mi tabata sintiendo e tempo ey, mi no kier a comparti e potret mas. No sin comparti e storia aki prome. Aunke e storia aki por zona tristo ami ta wak mi mes bek y ta wak un persona cu tabata y ta resiliente, sin sa e tempo ey e nificacion y existencia di e palabra. Mi lo haya sa di dje si e siguiente aña, ora mi haya psicologia na scol, ora mi a haya literatura cu a yuda mi compronde mi mes mas miho.

Apesar di no a logra e prome aña ey, mi a sigui y aunke tin ora mi gusta ‘gaslight’ mi mes y bisa cu e estudio di Pedagogia tabata facil compara cu otro nan y cu mi tabata tin djis suerte, den profundidad di mi curason y alma mi sa cu esey no ta berdad. Mi sa di tur e biaha nan cu mi a lucha, di tur e maintanan di inseguridad cu solamente canticanan por a lastra mi hiba mi scol, personanan cu a yuda mi (aunke mi tabata un mal amiga), te hasta e docente fastioso nan ey cu di un manera of otro a motiva mi cu nan “reverse psychology”. Wel no tur si, solamente e docentenan cu a inspira mi, pasobra no ta tur tabata maraviyoso.

Asina ta, e storia aki ta uno positivo. Mi a bisa e aña aki cu mi lo cuminsa skirbi mas ficcion, mas storianan di fantasia, incluyendo algun storianan 18+ cu lo incomoda algun di boso. No worry, nada hororoso solamente amoroso.

Esaki ta tur pa awe. Mi a skirbi mas di loke mi a anticipa. Tarea pa boso: conta cuanto “wordo” mi a skirbi den e storia aki. Mi kier sa mi a uza e palabra ey menos. Mi ta purbando por lo menos. Mi docente tin rason Papiamento ta un idioma bibo, activo. Mi ta spera cu e articulo aki tin mas zjeito cu esunnan prome.

Cuida curpa.