Durante mi estudio di Pedagogia na Rotterdam, Hulanda, mi a haya algun modulo di comunicacion.

Mi temporada faborito

Alrededor di april, ora cu ya caba e flornan ta cuminsa sali, matanan ta bira mas berde y e paharitonan ta cuminsa canta mas trempan, mi a cuminsa cu modulo di comunicacion 1. Mi no por kere cu esaki ta mas cu 10 aña pasa. Durante lengte mi beis ta cuminsa bira miho door cu e temperatura ta bira mas caloroso y e dianan tabata yegando cerca pa mi bay cas. Tur zomer mi a bin Aruba pa pasa tempo cu mi famia y disfruta di lama. 

Ay no… mi mester papia?

Durante e prome les di comunicacion, nos klas tabata sinta den forma U (u-vorm) y na comienso di e les e docente a laga nos introduci nos mes y bisa algo leuk di nos mes. Di biaha mi a haya e sentimento cu mi no ta bay gusta e les y cu e ta bay bira un reto pa mi. Tur persona cu ta den formacion pa bira un trahado social lo haya cursonan similar, mirando cu nan lo mester bay papia cu cliente, dependiendo e tipo di trabou cu nan ta bay eherce. Trabou social ta un profesion amplio, caminda nan tira bo bo lo mester landa. Mi tabata consciente di e importancia di e modulo, pero e echo cu mi lo mester papia Hulandes ora di tene combersacionnan cu mayoria bes lo bay ta emocional, a duna mi tur sorto di ansiedad. Riba dje na final di e prome les, despues di a conoce mi un poco pa apenas tres ora, e meneer a acerca mi. Mayoria studiante ya caba tabata cu tas den mas y saliendo for di e klas.

Insigur? Ami?

“Het lijkt alsof je onzeker bent.” Mi no a wak, pero por a sinti manera un bapor cayente ariba mi cara. E docente no a comenta nada, pero mi por a imagina cu mi cara tabata cora manera un tomati of mi tanta despues di a sali pafo den solo pa dos seconde. Den mi mes mi ta: “meneer, mi a haya suficiente pa casi tus modulo te cu awo y bo no tin idea di e traumanan escolar cu mi a pasa aden un aña prome, por fabor.” E meneer a pidi mi pa mi keda un rato pasobra e kier papia cu mi.

Okay… porta un tiki

Ami ya caba a cuminsa crea yen di scenario den mi cabes. Esun cu mas a ansha mi ta si e docente mester bin bisa mi cu e estudio aki no ta pa mi, door cu ya caba mi a cambia di estudio. E meneer a pidi mi pa nos sinta pafo di e klas na un di e bankinan cora. Nos tabata na e edificio di Hogeschool Rotterdam na Museumplein, dus si bo tambe a studia na e scol ey, bo lo sa exactamente cua banki mi ta referi na dje. E meneer a splica mi cu el a haya e impresion cu mi ta mustra insigur y cu mi lo mester bay traha ariba mi actitud mirando cu mi lo bay traha cu cliente den futuro. Adicionalmente el a bisa cu mi ta na tempo pa traha ariba e habilidad aki door cu ta awo mi a cuminsa cu e estudio y cu e por recomenda mi pa bay coaching’. 

Pensando e bek, di berdad mi tabata un poco insigur (of hopi). E docente a sigui splica mi cu un studiante di ultimo aña lo bay yuda mi, naturalmente si ami ta interesa. Wel, mi a acepta di biaha, casi sin pensa, pasobra mi kier bay bon na school y kier logra termina e modulo cu exito. E coaching di e studiante no a echt yuda mi cu e proposito di e docente di comunicacion, pasobra ami a scoge pa trata ariba otro meta. 

For di mi zona di confortabel

De bes en cuando ainda mi ta insigur, tur hende ta, e ta e cos mas natural di mundo. Despues di a traha algun año na un organisacion caminda regularmente mi tabata duna tayernan, entrevistaban y conferencia di prensa, mi a cuminsa bira mas asertivo ora di papia, pero mi ta sospecha fuertemente cu e tin di haber cu e idioma. Papiamento ta mi idioma y e herment mas importante pa mi ora di duna un mensahe.

Scucha e hangua cay

Biniendo bek na e topico principal di e storia aki, “stiltes laten vallen”. Durante e lesnan di comunicacion e docente e siña nos e importancia di laga silencio cay. E ta zona asina ridiculo na Papiamento mi sa. Mayoria estudiante tabata hay’e fastioso pa “laga silencio cay”. Imagina bo puntra un hende algo y e no contesta bo. Ta reina un silencio enorme memey di e espacio entre boso dos. Abo sinta ta warda ariba un contesta. Bo ta cuminsa soda di nervio te ora cu porfin e otro persona bisa of haci algo. 

Despues di hopi aña mi a bin ripara e importancia di laga silencio cay. Den mi parecer e no ta algo cu nos ta costumbra cu ne na Aruba. Bo puntra algo mayoria hende ta spera un contesta inmediato. Bo tarda un poco den bo contestacion hera nan ta kere cu bo ta gaña of tin algo di sonde. Ta parce tin ora manera nos tin miedo di silencio y cu si bira mucho keto e otro persona por scucha nos pensamentonan y lesa nos historia completo. E ta un momento, pa algun, asina imcomodo pasobra bo ta habri y bo ta vulnerabel. E silencio ta parce di ta traha psicologicamente ariba e persona y e ta bay hay’e practicamente obliga pa papia.

Papia menos coba mas

Den e combersacion usun cu ta puntra lo tin un e funcion di haci pregunta, brinda espacio y sostene, pero si e persona mes ta hay’e un reto pa laga silencio cay e lo no por hiba e combersasion na un nivel mas profundo. Claro e lo por saca algun informacion superficial, pero door di laga e silencio cay bo ta duna espacio na e persona. Ta manera bo ta habri e tapijt cora y duna e persona su momento pa conta y expresa su mes. 

Baha velocidad por fabor

Pa un isla, nos ta hopi pura. Mi mes a biba den un ciudad pa 6 aña y kere mi nos ta bayendo den e direccion di ta den un rapidez constante, mescos un machine. Tin ora mi ta pensa tambe cu un persona ordinario, cu no tin conocemento di trabou social, por sinti ora di tene combersacionnan di contenido (pisa) cu e no ta ekipa pa brinda ayudo na e persona. E consecuencia lo ta un combersacion pura y sin rumbo. Comunica consciente y bo lo ripara cuanto biaha nos lo bisa cosnan manera “ahh ya, si si, fastioso, etc.” Mi mes sa haci esaki, especialmente ora mi ta den pura y cansa. Mi ta realisa cu e no ta bon, pasobra tin ora ta un momento bo tin pa pone atencion y conecta cu un persona. Awo ami ta gusta mas y mas duna espacio na otro personanan den combersacionnan, pero tambe ora di duna les. 

Raar ventje?

Mi a haya e meneer un biaha mas den mi di tres aña di estudio, pero pa ‘Maneho di conflicto’ y e tabata tin un otro acercamento cu mi. E tabata desafia mi, pero nunca mas el a bin bisa mi cu mi ta insigur. El a sigui pusha mi pa keda haci lo miho cu mi por. E meneer tabata tin un manera di haci su lesnan improvisa. Mi ta 100% sigur cu e no tabata traha cu plannan di les, pero tabata manera sigui e manual di e modulo, pero na su antoho. Di un banda ami tabata aprecia esaki, pasobra e tabata laga teoria un banda y pone no practica. Basicamente e tabata siña nos loke realmente ta importante. Sin embargo no ta tur studiante tabata aprecia esaki. 

No lipstick

Un biaha e meneer a bin comenta ariba mi lipstick cora. E no a hacie dilanti ful e klas, pero ora cu nos tabata den pauze. El a bin puntra mi dicon mi ta uza lipstick asina fel. Den mi ultimo aña el a wak mi ariba gang di scol y el a bin cuminda mi. El a complimenta mi color di lipstick. Mi tabata tin ‘Amor Prohibido’ di Selena ariba mi lip, un color di cla. Mi a bisa mi amiga, cu tambe a yega di haya les di e mesun meneer. El a cuminsa tenta mi cu e meneer. Mi sa cu e ta djis hacie pa tenta. Pensando e bek awo. Ami como docente lo no comenta hamas ariba aparencia di un studiante. Mi no sa si mi ta haya comentario di e meneer ey inapropia, mi djis sa cu ainda mi ta aplica varios di e cosnan cu el a siña mi, den mi trabou diario como docente y trahado social.

Abo ta hay’e inapropia? Anto abo ta duna espacio ora di combersa of bo ta djis “cayente” pa contesta?