Prome cu boso yama mi ‘Grinch’ di Pasco (pa (purba) di horta boso spirito navideño), laga mi cuminsa bisando cu e storia aki no ta pa critica ningun artista. E articulo di awe ta simplemente un reflexion di un cantica cu ainda ta basta popular durante temporada di fin di aña.

Awo cu nos a kita e ‘disclaimer’ for di caminda, nos por cuminsa. Mi tin boso atencion of cabes ta pa fiesta caba? Prepara pa mi hiba boso bek den tempo. Pa algun e lo sinti manera hopi tempo atras, pero pa mi e ta sinti manera ayera. 

2009

E aña tabata 2009. Tempo di “mal” moda, pero miho rudia, menos dolor di lomba, Lady Gaga (y literalmente mal romancenan), pero un dushi tempo, pasobra apesar cu ainda mi tabata bay scol, definitivamente mi tabata tin menos responsabilidad. E tempo ey mi tabata traha den un pacus den caya grandi (y kisas mi a te hasta cumpra un paar di keds recien na e tienda) manera mi mama sa bisa: “mi no por sufri.”

Na 2009 caya grandi tabata tin hopi mas bida, especialmente durante fin di aña. Net fin di e aña ey dos artista di Aruba a deleita ful e comunidad Arubiano cu un treat super special. E cos ey tabata zona tur skina cu bo a bira. Bo no por a scapa di scucha e cancion aki. Na trabou, door cu nos no tabata mag di toca radio, nos tabata tin e CD riba ripiticion. Ta trata di nada mas cu ‘Papa Noel’ di Basic One y Biggie Boy (actualmente miho conoci como Jeon). 

Tempo di Gloria

Canticanan, mescos cu cierto holonan tin e magia pa transporta bo den un temporada specifico di bo bida (pa memorianan bon y menos bon). Awo, ‘Papa Noel’ tur aña ta hiba mi bek stret pa 2009. Bek den e pacus druk, yena cu clientenan (tanto local y turista) puntrando pa prijs y size di sapato. E epoca ey ainda tabata tin un fluho grandi di Venezolanonan cu tabata bishita nos isla y tabata haci compras pa un delaster famia (y tin ora sin puntra pa prijs, mucho menos descuento). Mi no ta gaña ora mi bisa mi a yega di bende 12 paar cu djis un cliente so.

Okay, ban bek na e nucleo di e storia aki cu ta e cancion di ‘Papa Noel’. Pa por a skirbi e storia aki completo mi a haya mi ta scucha e cancion algun biaha tras di otro pa asina mi por skirbi e letranan. Di e manera aki mi por a analisa e cantica miho (pasobra antes mi no tabata echt worry pa sinta scucha niun letra, awo si). 

Mas sushi, mas miho

Personanan cu conoce mi (mi kiermen cu sa kico mi ta scucha den auto na caminda pa trabou y bek pa cas) sa cu e canticanan cu mi ta scucha no ta nada limpi. Sigur, de bes en cuando ainda mi sa pone baladanan di aña ochenta y nobenta den auto (ora mi ta sinti romantico), pero varios di nan no ta dje inofensivo ey tampoco. Mi tabata un adolescente entre 2002-2011, naturalmente mi a lanta cu reggaeton (y ainda ta scucha nan sin berguensa). Mi mama ta yama nan canticanan cu ta zona manera un wasmachin pega cu ta keda bati. Loke cu a cambia ta cu mi a bira mas consciente di loke mi ta scucha. Asina e idea a cuminsa pa skirbi e articulo aki. Mi a scucha ‘Papa Noel’ recientemente y mi a scucha e letranan cu mas atencion (mi ta sigur cu tin hende cu di 2009 caba tabata tin e realisacion cu ami a djis caba di haya awo).

Trece Regalo pa mi Coge

Mi no ta bay pone ful e letra di e cancion aki riba, pero si ta bay para keto na algun parti. E cancion ariba su mes ta repetitivo, simpel, pero cu bon saus. Mi a yega di bisa den storianan anterior cu ami no ta un persona musical. Lamentablemente mi no por a profundisa den e aspecto mas tecnico di e cancion. Mi sa cu nan ta grita ‘mambo’ den e cancion, cual ta un genero di musica di origen Caribense, especialmente Cuba. Ami no sa si mi por scucha esey bek den e cancion. Mi a bay scucha algun mambo, pero toch ‘Papa Noel’ ta sinti manera cu e tin algo mas aden cu djis mambo. Abo, lector cu miho conocemento di musica, educa e yiu aki tocante e genero di e cancion, pasobra mi no por saca afo ta kico e ta (esaki mi ta keda debe boso). Mi por djis bisa cu e ritmo ta contagioso (ainda despues di 15 aña).

Letranan Machista?

Awo, e ‘Debbie Downer’ den mi no por despedi sin duna algun remarca di e contenido mes di e letranan di ‘Papa Noel’. Manera varios cantica cu bon ritmo, ‘Papa Noel’ su letranan, den mi buki, no a resisti e prueba di tempo. E no ta manera otro cancionnan clasico cu ainda ta popular cu si ta pasa e prueba di tempo, por ehempel ‘Cariño’. Okay, kisas esey no ta e miho comparacion. Miho mi compara e cancion cu e ‘Palo di pasco’ of ‘Helena su ham’, pero ambos no tabata tin e mesun exito cu ‘Papa Noel’, dus mi no ta haya e husto pa compara nan. Loke mi por bisa ta cu tin un diferencia grandi den scucha cancionnan cu letranan “vulgar”, den otro palabra sexual, cu scucha cantica cu simplemente ta machista. Ey mi ta pone e liña, ey mi ta perde interes pa sigui scucha, pero e ta keda dificil pa djis stop di scucha un cantica cu tabata “on repeat” den “tempo di mi tempo”.

E cancion di berdad ta machista? Pa algun rason mi tabata tin un poco dificultad pa distingui letranan dobel sinti den e cancion aki. Na prome instante, ora cu mi a cuminsa scucha e cantica un poco mas critico mi a kere cu e tabata trata di un hende homber cu kier dos chick. Un cu ta “material” pa casa y e otro e lo kier como amante. Mi no sa pakico esey ta e direccion cu mi a kere cu e cantica ta bay (mi prehuicionan). Aunke tin un parti di e cantica unda cu Mr. Eisden ta bisa: “Un cu ta trata mi manera un rey (e casa) y un cu kier mi pa ta su vrij” (e amante). Ademas den un otro parti di e cancion Mr. Eisden ta bolbe bisa: “Manda mi uno masha bunita cu wowo berde cu un ta reclama (e casa). Manda mi uno un tiki diki, cu un tiki triki cu ta fama (e amante). Mi ta kere pa e partinan aki di e cancion mi a asumi cu e lo kier un casa, pero algo na banda tambe.

Tur Dos ta Strica, Strica, Strica

Ora cu mi a cuminsa scucha mas di cerca mi a realisa cu ta trata di un meneer cu ta pidiendo ‘Papa Noel’ dos chick pa pasco. E motibo prinicipal ta, pasobra supuestamente tin hopi trabou pa haci na cas, pa ta specifico hopi paña cu mester laba y strica. Adicionalmente tin trabou pa haci den cura y esey ta e motibo cu e mester di dos muhe (pasobra pa esey hende muhe ta bon). Tur dos lo traha duro, pasobra specificamente Mr. Eisden ta menciona cu tur dos lo strica y e ta zona manera nan lo ta ocupa pa un bon rato. Apesar cu Mr. Eisden ta menciona cu e ta bay dorna e chicknan na streki (esaki ta dobbel sinti?) y cu e lo ricibi nan cu hopi amor, toch e ta bay pone ambos traha. 

Hende Homber bo no ta Special pa Bari y Mop na Cas

Ami no ta kere cu niun hende muhe kier mas tarea durante luna di december (dus mi ta spera cu ‘Papa Noel’ nunca a haci Mr. Eisden caso y a laga e sin regalo mes. Ya cu nos a para un rato na e topico di trabounan di cas, mi kier menciona algo cu kisas algun di boso no a reflexiona riba dje. Hende muhe pa hopi tempo, aña, decada, siglonan a carga e “magia di Pasco” door di haci mayoria cos na cas. Ami tin e suerte tin por tin un tata cu henter dia di Dios por pasa trahando pafo (ami lo smelt), cu ta practico cu su mannan y no tin miedo di haltura. Loke mas mi ta encanta ta cu e no tin miedo di coy un basora pa bari, ta laba e co’i kibranan y por cushina diferente plato dushi (e ta ‘season’ cu un delaster condimento cu e haya). E aña aki mi tata a te hasta dorna cas. Mi casa lo no traha henter dia pafo manera mi tata (e lo smelt prome cu mi), pero mescos mi tata e tambe ta haci trabou na cas. Ami no mester wak esaki como “suerte”, pasobra tur hende homber por haci mescos. Abo, como hende homber no ta special pa haci algun tareanan di cas, pasobra esey ta un deber di cada persona cu ta biba den un hogar, sin importa e sexo.

Hende Muhe Check un Rato na Kico Abo Mes ta Aportando

Mi ta realisa tambe cu nos como hende muhe mes tin ora ta contribui na e cultura di machismo aki, door di trata nos hende hombernan manera cu nan man ta mara tras di nan lomba y nan no mester coopera cu nada na cas. Kisas berdad e hende homber ta traha henter dia (pero nos no ta den tempo di Lago mas, hende muhe tambe tin trabou ‘full-time’ awo), pero e mentalidad di “jagers en verzamelars” aki mester caba, pasobra nos ta haciendo nos hende hombernan “mancaron” mientras nos ta independisando y empoderando nos mucha muhenan. Nos mucha hombernan ta kedando atras. E mentalidad aki no lo cambia di un dia pa otro, pasobra e ta den e reis profundo di nos (of algun di nos) sistema di creencia y balornan, pero nos mester bira mas critico cu nos mes y nos custumbernan (no ta tur cos ta di normalisa).

Conclusion

Mi pregunta final. Si ami, como hende muhe, saca un cantica pidiendo ‘Papa Noel’ pa dos guy (of chick), con boso ta kere e comunidad lo reacciona? Ami honestamente no ta kere cu nos sociedad lo ricibi e cancion aki cu mesun gracia si e tabata canta pa un hende muhe pidiendo pa dos guy.

Mi kier termina e storia aki bisando cada un di boso un bon pasco. Corda conexion ariba perfeccion!

Si bo a yega te final di e articulo aki, comenta ‘snowflake’ pa mi sa cu boso a lesa e ful.

P.S. mayornan, duna e yiu homber un basora of un paña pa e pasa Pledge y kita poco stof for di e cashinan prome cu Pasco bati na porta.