Pa,

Kico un homber ta haci ora cu e haya sa cu e ta bay bira tata? 

Provee. 

Esey ta exactamente loke cu Pa a haci ora cu mi tabata den bariga di Ma. 

35 aña pasa Pa a cuminsa traha pa por cubri tur mi necesidadnan di baby. 

Desde e dia ey Pa no a stop di traha. 

Ni maske cuanto nos zeur pa Pa para keto sikiera un rato.

Mi a haya tino (algun lo bisa cu no) y ta corda Pa den uniform blauw. 

Ora pa tabata yega cas bon cansa mi tabata yuda Pa kita pa su boots, aunke cu mi mannan di kleuter tabata lucha cu nan. 

Den transcurso di aña e uniform su modelo a keda cambia, pero el a keda blauw. 

Ora mi wak colo blauw mi ta asocia e colo cu Pa.

Mainta Pa ta sali cu e uniform limpi y ta yega bek atardi cu e uniform bruin. 

Algun rasca na e mannan cu tempo a haya cayo y a bira grof. 

Mi kier pa Pa sa cu mi ta reconoce Pa su sacrificionan. 

Oranan largo den solo, riba dak peligroso y tin ora sin break. 

Ora mi wak e pickup yega atardi mi ta cuminsa imagina con cora e cara lo ta (pasobra Pa no ta tende di mi y uza proteccion solar).

No tin un dia cu ta pasa cu no ta gradici Dios pa a duna mi un tata manera Pa. 

E bida cu ami y mi rumannan tin ta danki na Pa su esfuersonan di cada dia. 

Un bida simpel, sin vacacion den exterior, pero cu Pa na cas cu nos den temporada di Pasco y semper cu cuminda riba mesa. 

Los di necesidadnan basico Pa a siña mi pa no bula cu hala di manteca y pa corda cu loke cu mi scupi ariba lo bin cay bek den mi cara.

Mi tabata chikito y ainda na grandi mi rumannan y ami no tur ora ta compronde Pa su metaforanan (algun ta duna nos gana di hari de bes en cuando).

Den e 35 aña cu Pa tin trahando semper pa a conta nos di tur e aventuranan cu Pa ta experencia na trabou. 

Pa ta papia di coleganan cu Pa ta pasa tempo cu nan (te hasta coleganan cu no t’ey mas) y clientenan cu semper Pa ta saca tempo pa papia cu nan (incluyendo toca caha di orgel).

Ta p’esey mes algun ta ofrece Pa algo di bebe y come, pasobra pa ta dedica na Pa su trabou. 

Den e reseñanan cu Pa ta manda nos den groupchat di famia nos por wak experticio y dedicacion na Pa su trabou cu detayenan interesante di airco.

Pa, masha pabien cu e aniversario di trabou. 

35 aña ta nifica hopi sodo di frenta. 

Mi ta pidi Dios tur dia pa Pa yega e edad di pensioen (y hopi mas despues di esey) pa Pa por haya e descanso cu Pa merece. 

Mi sa cu si nos pidi Pa para keto, toch Pa no lo hacie. 

E ta den Pa su naturalesa pa ta balente. 

Mare mi a hereda mas di e caracteristica ey di Pa (un poco so mi a haya). 

Sinembargo, Pa su sentido di humor (y temperamento) si mi a ricibi.

E tabata un privilegio pa a crece (y sigui crece) cu un tata manera Pa. 

Stima Pa, semper.

Jeanmiree