Si, mi ta bek cu un otro top 10. E tabata entre esaki of skirbi tocante morto y entiero. Mi echt no kier a pone mi mes den un huki vulnerabel y core e riesgo cu mi lo haci mi mes tristo riba mi ultimo dianan di vakantie (si, mi a cuminsa skirbie den vakantie y no a cab’e).

Pa e ocasion aki e top ta un tiki mas dificil. E no ta trata di un genero, wel si, pero no, pasobra di e un genero ey tin diferente taki di mata. Algun cu mi gusta y varios cu mi ta djis admira di leu. E siman aki nos top 10 ta trata di musica rock, specificamente di aña 2000 pa 2010. Pensa riba ‘alternative’, ‘punk’, ‘metal’, etc.

Pa haci e lista un poco mas strak, mi ta bay lag’e na un cancion pa artista of banda. Esey kiermen cu mi lo no ripiti e artista dos biaha (si no e top ta bira ful di Linkin Park cu Blink). Cu algun artista of banda e lo ta un reto pa scoge djis un, pero esey ta e parti leuk di traha e topnan aki. Anto e lista lo ta di cancionnan cu mi tabata scucha durante 2000-2010, dus si mi a namora despues di un cancion di e tempo ey (manera varios cancion di Deftones y Creed) e lo no ta den e lista aki. Anto e lista aki lo consisti di cancionnan na Ingles solamente. Mi sa cu tin hopi cancion di rock bon na Spaño, pero esey ta pa otro lista.

Sin conta demasiado, manera semper, ata mi top 10.

Linkin Park – One Step Closer (2000)

Claro! Cua mas? Okay, okay, Hybrid Theory tabata yena cu bon cancion, pero finalmente ora mi pensa riba Linkin Park, riba Chester, esaki ta e prome cantica cu ta bin den mi mente. Ademas ta ami so ta automaticamente cuminsa ‘headbang’ asina cu mi oidonan scucha e intro di e cancion? Mi no ta kere. 

E cancion aki no ta hiba mi na un momento specifico di mi adolescencia, pero si na un epoca. Abo ta corda con e ta sinti ta pa tin 13 aña? Honestamente mi no kier corda. Algun aña atras un version di mi lo a muri pa bay bek den pasado, pero e version di mi den presente lo no kier esey mas. Pakico bay bek?

Mi ta corda cu mi tanta tabata hiba ami y mi tanta tur mainta scol den su Daewoo cora (mi no ta corda e modelo si). Door cu mi tanta y ami tin casi mesun edad mi ta wak e mas manera mi prima. Trempan mi tabata cana bay cerca mi tanta pa despues nos busca mi tanta/ prima pa bay scol. Prome nos tabata baha mi prima door cu e tabata cuminsa mas trempan y despues ami. Den e fraccion di minuut cu mi tabata warda pa mi tanta sali for di su cas, mi tabata core aplica ‘eye liner’ preto bou di mi wowo. Mi no ta ni corda unda mi a haya ‘eye liner’. Kisas mi a hort’e di mi mama? Ken sa. E maniobra aki mi a haci sigur pa un luna. Te ora cu mi mama a ripara merdia ora cu e busca mi cu mi wowo tabata parce di un panda. Asina el a haya sa cu su yiu muhe adolescente a cuminsa uza makiyahe. 

‘Eye liner’ cu e combinacion di Linkin Park merdia despues di scol na Station X, hunto cu e hormonanan furioso den mi curpa a pone cu mi mayornan (y kisas algun famia mas) pensa cu mi ta den un sorto di culto satanico. Si, manera boso a les’e; un culto satanico! Imagina si mi tabata scucha Korn di e tempo ey? Nan lo a yama pasto pa bin batisa mi di nobo. 

Den defensa di mi mayornan e zonido di Linkin Park ta ful otro na e rocknan cu nan ta custuma cu ne di decada setenta, ochenta y nobenta. Chester lo a spanta nan.

Good Charlotte – Hold On (2002)

E no ta nada straño cu humanonan por haya nan mes den un ‘rollercoaster’ di emocionnan, pero adoloscentenan ta experencia esaki mil biaha mas fuerte y tin ora cu poco comprension y apoyo. ‘Hold On’ manera e siguiente cancion den e lista aki tabata sinti manera un abraso necesario ora cu mi tabata un adolescente. Te hasta como hoben adulto y awo djis adulto (di casi edad mediano caba) e cancion aki ainda ta sinti manera un anker ora cu bo no sa kico bo ta sintiendo. ‘Hold On’ no ta djis un cancion, pero un recordatorio cu salud mental tabata existi di hopi tempo caba, desde semper. Awor e ta dos palabra cu constantemente ta wordo menciona, manera cu e ta algo nobo, pero problemanan di salud mental ya tabata existi. E cancion no ta solamente un recordatorio cu salud mental ta importante, pero cu bo no ta bo so. 

Avril Lavigne – Nobody’s Home (2004)

Mi ta hay’e apart cu e tempo ey hende tabata pensa cu si bo tabata scucha rock bo tabata den algun tipo di culto. Satanic Panic a tarda pa yega Aruba of e adultonan e tempo ey tabata husga demasiado lihe? Mi ta corda na scol tabata tin un division di grupito. Of bo ta scucha bailabel, rock, of rap. Casi no tabata existi un combinacion. Tur cos tabata manera blanco of preto. Wel, pa mi esey no a dura mucho si pasobra mi a pasa casi ful un aña ta scucha rock y na mei mi heupnan no por a para ora di scucha ‘Gasolina’. Kisas mi ta e excepcion, of kisas mi no ta special manera mi ta kere cu mi ta y tabata tin hopi mas ta scucha tur loke nan curason ta desea (of cu ta pone nan curpa bati). 

En todo caso mi ta corda mi a intercambia mi CD di ‘Under My Skin’ di Avril Lavigne cu un compañera di klas. El a fia mi un CD di rap, ami no ta ni corda di cua artista. Mi ta corda ora cu el a trece bek pa mi, el a comenta cu e cancionnan ta yena cu odio mescos tur cancionnan di rock. Ami tur confundi a keda pensa. Odio? E tempo ey mi tabata super timido, dus mi no a sigui puntra nada. Sinembargo, mi a keda pensa. Ta cua cantica tabata di odio? Sigur, den algun di e cancionnan Avril ta zona rabia, coña, pero pa motibonan valido. Di e dia ey mi a realisa cu e letranan tin otro nificacion pa cada persona y cu tin persona por sinti nan mes identifica cu e letranan mas cu otro, dependiendo di e experiencianan di bida. 

Mas di 20 aña despues ‘Nobody’s Home’ ta keda special pa mi. Manera un abraso caluroso despues di un dia duro. Di un manera of otro e cancion ta keda adapta na mi, pa mi. Asina e ta sinti. Mi a yega di skirbi un articulo mas largo di ‘Under My Skin’ pa si bo ta interesa. Lesa aki.

Blink-182 – Feeling This (2003)

Mi kier sa cu di tur e artistanan den e top aki Blink-182 tabata esun mas dificil pa scoge un cancion. Cu Blink-182 ta den e lista ta logico. Ora ami pensa riba punk rock den decada 2000, ta riba nan mi ta pensa prome. Door di tur nan exitonan musical mi mester a pensa duro riba cua tabata tin mas impacto pa mi. Okay, impacto ta un palabra grandi pero imagina bo ta yega for di scol, bo ta come y core haci bo huiswerk pa despues bo sinta dilant’i di TV pa wak ‘videoclips’ anto esun di ‘Feeling This’ ta yega na beurt. Djis imagina, okay? Claro cu  bo tin tur e otro canticanan cu kisas tabata mas popular y mas toca, boso sa cua nan ta, pero djis imagina bo mente di adolescente wak tur e rebeldia, desobediencia, sensualidad y sexualidad den e videoclip ey. Bo señal pa manifesta (mi nunca a hacie si… ugg).

Switchfoot – Meant to Live (2003)

Durante mi adolescencia e cancion aki tabata tin un otro nificacion, of peso, di cual e tin awo pa mi. Antes e tabata djis un cancion cu mi tabata scucha y canta, pero awo den mi 30, caminda crisis existencial ta dal tur luna, e ta sinti otro. Awo mi no ta scuch’e pasobra e ta zona bon, si no pa motibo cu e ta baha bon durante tempo di stress, incertidumbre y djis ami haciendo tur cos mas complica di loke nan tin cu ta cu mi pensamentonan iracional. Mi no por ta e unico ‘millenial’ cu ta sinti mesun cos. 

Evanescence- Bring Me Back ft. Paul McCoy (2003)

Manera boso por a nota no tin hopi hende muhe den e lista aki. Ora mi pensa riba un bos femenino poderoso di aña 2000, mi ta pensa automaticamente riba Amy Lee. ‘Bring Me Back’ ta e prome cancion cu mi a yega di scucha di Evanescence y mi ta durf di bisa cu e ta un di nan cancionnan mas popular (coregi mi si mi ta fout). Ami tabata gusta e cancion aki specialmente pa e letranan, e ta un poco “angsty”, cual mi gusta, pero tambe door di e bos incomparabel di Amy, duh. Mi no mester splica mas. Aparentemente Amy a skirbi e cancion aki pa su casa; un homber cu suerte.

Tokio Hotel – Monsoon (2007)

‘Monsoon’ ta hiba mi directamente na 2008 (aunke el a sali 1 aña prome, mi sa). Mi ta corda cu mi tabata wak e na MTV. E prome biaha mi a wak e video clip mi tabata un poco distrai door di e cantante. Mi no por a distingi si e tabata homber of muhe (e ta zona loco, mi sa), mi djis sa cu mi tabata atrai na dje inmediatamente. Mi gusta cu e cancion ta cuminsa slow, pero ta bira mas pisa despues. E cantante su bos ta suave, pero hees/ kras na mesun momento. Mas cu tur cos mi tabata gusta e cancion pa su letranan. Na 2008 mi a caba di cuminsa Colegio Arubano, manera cu mi a menciona den mi articulo anterior, plus e prome guy cu mi a presenta na mi mayornan dos luna prome a “ghost me” e tempo ey, dus mi tabata scuch’e hopi. Boso ta di acuerdo cu mi cu e cantante ta djis “eye candy” apart di ta un cantante maraviyoso?

Hoobastank – The Reason (2003)

Okay di e cancion aki si mi tin un memoria super specifico (cu no ta ami sinta dilanti di TV). Mi ta spera mi tata no ta lesa mi blogs mas, pasobra e informacion aki ta un poco bergonsoso. Okay boso ta corda e charlanan di ‘Let’s Talk’? Esun cu nan tabata haci na ‘Renaissance Convention Center’? Ami tabata djis odia bay e cos ey door cu tin demasiado hende. ‘Introverts’ no tin nada di haci na e luganan ey. E intencion ta bon, pero ami ta corda cu mi tabata djis pura pa sali di ey nan. 

Mi ta corda cu durante e pauze nan a cuminsa toca musica, entre otro ‘The Reason’. E tempo ey mi tabata gusta e cancion ey masha hopi mes. Mi tabata scuch’e na TV y ora mi tabata sinta warda mi mama na su trabou. Mi no ta kere cu mi tabata sa mes kico YouTube tabata e tempo ey, ni si mi lo a hay’e eyriba si mi a busc’e. En todo caso, ora e cancion a cuminsa zona den e pauze mi a bira asina emociona. Mi tabata tin dos amigo sinta cada banda di mi, pero esun na mi banda drechi tabata mas cu un amigo. E tabata tin mi man wanta. E combinacion di su dedenan crusa cu esun di mi y e calor cu tabata haciendo den e luga a pone cu nos mester a tuma un pauze di wanta man, pasobra nos tabata literalmente sodando. Nos a sec’a nos man na nos jeans y a sigui wanta man. Si, esey ta un storia tutu di mi prome “amigo”. Nos a kibra un luna despues, pero toch nunca mi lo lubida e momento ey, anto cu un di mi cancion faborito den fondo. 

The Rasmus – In the Shadows (2003)

‘In the Shadows’ no ta solamente un cancion cu letranan memorabel, pero e melodia mes di e cancion ami tabata notabel y cu ta distingui nan cancion di tur otro. Ami no ta un persona musical y mi ta desea di por a bay mas profundo cu loke mi kiermen, pero como cu musica no ta mi area di experticio, mi ta abstene di papia di topiconan cu mi no tin suficiente conocemento di nan. Cerca mi en todo caso e melodia, sinfonia y ritmo ta graba te dia di awe. Apart di e letra emocional cu mi ta kere cualkier adolescente cu tabata gusta rock den 2000 por a relaciona cu ne y e bos di e cantante, mi tabata gusta e videoclip tambe. 

3 Doors Down – Here Without You (2003)

Okay, literalmente te dia di awe cu mi scucha e cancion aki e ta haci algo cu mi curason. No un dolor, ni sentimentonan di amor, pero definitivamente un emocion. Mi no por corda e prome biaha cu mi a scucha e cancion aki, ni na unda, pero cu e tin un luga special den mi curason pa un motibo of otro, sigur. 3 Doors Down tin basta cancionnan bon, pero esun aki ta mi faborito y definitivamente un bon escogencia ora di karaoke. 

Conclusion/ pensamento final

Dus, kico boso a pensa di mi top? 2003 tabata un bon aña pa rock, esey so mi por bisa. Mi sa cu algun di boso ta bay ta desapunta. Ya, mi a cuminsa scucha Korn despues di 2010 y mi no ta un fan di Slipknot (sorry). Por cierto, e siman aki mi a haya sa e echo cu mi cancion faborito di Deftones, ‘Digital Bath’, ta trata di e asesinacion di un chick den badkuip. Ami nunca lo por a pensa. Mi a kere e ta di sex. Awo mi no sa si mi kier pa e ta mi cancion faborito mas. Nos tur ta pone nos percepcion na arte. Den e caso aki e cantante mes a bisa den un entrevista cu e cancion ta trata di mata un chick den un badkuip. Creepy, pero mi ta bay pretende cu e ta di sex. 

Anto si, Green Day tampoco ta den e lista (mata mi), pero esey no kiermen mi gusta nan musica menos. Djis kisas nan impacto riba mi tabata menos. En fin, boso no mester ta di acuerdo cu mi top. Cua cancion boso a haya falta di dje den e top? 

Long Sidenote

Mi ta sinti mi ta ‘oversharing’ den e ultimo tempo. E articulo aki mes tin hopi detayenan di mi bida cu no ta facil pa djis simplemente comparti. E parti bunita di skirbi ta cu bo por ta honesto y vulnerabel cu bo lectornan. Sinembargo, nos ta biba riba un isla chikito. Loke mi ta purba di bisa ta cu den futuro mi lo cuminsa skirbi cosnan mas superficial lamentablemente. Ademas mi no kier saca mi mesun keshi (anto gratis). Yes, mi ta bay pone boso paga pa lesa mi storianan mas intimo den un futuro cercano. Mi djis kier a comparti esey.

Por cierto, e loco aki a dicidi di sigui cu su maestria despues di hopi duda durante zomer. Esaki ta nifica cu mi lo skirbi menos atrobe. Mi ta bay haci mi best pa duna boso un ‘update’ di mi bida cada kwartaal. Mi kier sinti bon ora cu mi skirbi y kier hacie sin presion (den e profundidad di mi curason mi sa cu esey no ta posibel). Mi suerte ta cu e palabranan ta basha ora cu mi ta cla pa skirbi. Despues di a casi considera elimina e website aki durante zomer, mi a dicidi di lag’e. Mescos e cancionnan den e top aki, mi blog ta mi anker y liña di bida desde 2023. Mi ta aprecia cada un di boso cu ta tuma tempo pa lesa y duna mi feedback y sugerencianan. Te otro biaha.

Cu amor,

Jammita