CW: Spiderman: Brand New Day spoilers!
Despues di hopi tempo mi ta haya un peticion pa skirbi di un topico specifico: mi cancionnan faborito di e genero reggaeton. Mi tabata a punto di subi e storia aki siman pasa te ora cu mi a realisa mi a lubida un di e cancionnan mas importante di e genero (por lo menos pa mi anto). Esey kiermen mi mester a adapta mi lista na ultimo momento, sin excepcion. Mi lo bin bek riba esey ora di menciona e cancion.
Mi no kier djis traha un lista caminda mi ta menciona mi cancionnan favorito di reggaeton, pero lo conta un poco di e prome conexion cu mi tin cu e cancion (si mi ta corda anto). Edad ta subi y de bes en cuando mi memoria a largo plaso ta faya mi. Sinembargo, si Ned por a corda ken ta Peter Parker, mi mester por corda sikiera algo di e cancionnan den mi lista.
Sin haci e introduccion mucho largo, esaki t’e top 10 cancionnan di e genero reggaeton mas esencial pa mi.
Tego Calderon – Pa’ Que Retozen (2003)
E memorianan cu mi tin di e cancion aki ta hiba mi bek na mi nochi di graduacion di scol basico. Dos klas bailando riba e podium di Club San Martin, sin niun necesidad pa compronde kico nos ta bailando pasobra e ritmo tabata contagioso. E tempo ey mi tabata super timido, cu 10 kilo di sobrepeso y djis super stijf, dus mi no por imagina mi mes di 12 aña bailando e cancion ey cu mi klas. E luho di e tempo ey tabata cu no tin medionan social, dus bo por a baila sin niun preocupacion di mundo. Awo cada movecion lo bay den un album di e pagina di Facebook di bo scol.
Honestamente ora mi pensa riba reggaeton clasico, esaki ta e prome cancion cu ta bin den mi mente y mi ta sigur cu ami no ta e unico. Den cualkier top, e cancion aki mester t’ey y punto.
Ivy Queen – Yo Quiero Bailar (2003)
Mescos cu e prome cancion, esaki tambe mi a baila e anochi di graduacion. Mi ta imagina e DJ a toca tur loke tabata tendencia e tempo ey, aunke nan no tabata nobo mas mirando cu nan a sali 2003 y ami a gradua na 2004 (grito interno). E ta logico si, e manera cu e mundo di musica di antes ta funciona ful diferente cu awo. Den tempo presente tur cos ta move mas lihe, aunke cu e tempo ey ya caba tabata existi diferente plataforma di musica, nan simplemente no tabata “main stream” manera plataformanan di awo.
Loke cu mas mi gusta di e cancion aki ta e letra, cu ta basta delanta pa su tempo y biniendo di un muhe. Ivy ta papia di consentimento: Yo te digo: “Si tú me puedes provocar eso no quiere decir que pa la cama voy.” Un tema cu ami ta haya ta resalta ta empoderamento y feminismo: Porque yo soy la que mando, soy la que decide cuando vamos al mambo, y tú lo sabes.”
Ademas Yvy ta contradeci e pensamento cu reggaeton ta sexualisa hende muhe: “Bailo reggaeton, pero no soy chica facil.”
E no a sorprende mi ora cu Bad Bunny a colabora cu Ivy p’e remix di “Yo Perreo Sola”, nan ta duna e mesun vibra.
Anto, si bo a yega di haya un tarea di scol pa analisa un cancion y bo a scoge ‘Yo Quiero Bailar’, sea orguyuso cu bo a scoge un di e miho reggaetonnan pa papia di dje. Mare mi tabata e docente ey pa por a les’e (chisme interno).
Daddy Yankee – Gasolina (2004)
Peak 2005 (pa mi). Mi no kier ni pensa con mi tabata baila e cos ki dilanti di mi mama anto sin berguensa. Ma, esey kiermen mi tabata sinti sigur cu bo. E parti di mas bergonsoso ta ora mi tabata splica e grandinan kico ‘Gasolina’ kiermen. Un mucha di 14 aña no tabata tin niun asunto pa sa e significacion, pero di jong mi tabata paga tino na letranan di cancion (cu excepcion di Club San Martin) y e ta basta obvio, no? ‘Gasolina’ pa mi ta literal e ‘Pour Some Sugar on Me’ di mi generacion.
‘Gasolina’ ta inigualabel y ta trece mi den un periodo caminda apenas mi a cuminsa discubri mi mes y desaroya mi propio identidad. Spoiler: bo ta bay sigui haci esey p’e resto di bo bida. Scucha di e adultonan ora nan bisa bo tuma bo tempo.
Mi memoria di termino largo ta hiba mi bek na tempo ricibimento y e prome y ultimo biaha cu mi mama a dicidi di traha ayaca na cas. Dushi tempo.
Zion & Lennox, Daddy Yankee – Yo Voy (2004)
Bosa ora bo discubri un cancion, bo ta namora di dje y bo ta keda cu ne riba ripiticion te ora cu bo fada of e cancion cuminsa zona diferente? Manera cu e ritmo ta mas slow of mas lihe? Wel, esey tabata e cancion aki pa mi ora cu scol a habri bek na 2005. Mi a convence mi mama pa cumpra un CD pa mi cu diferente reggaeton riba dje. Mi tabata scuchanan tur atardi despues di scol riba mi Discman ros. Si e cancion aki no pone bo move, e ora bo no tabata un adolescente cu a crece scuchando reggaeton den 2000.
Baby Ranks, Tonny Tun Tun, Daddy Yankee, Hector el Father, Wisin & Yandel- Mayor Que Yo (2005)
Eso, eso ¿con qué se come? ¿Con queso?. Ufff, 4 minuut di puro flow. Un ritmo contagioso y cu tur e duronan di reggaeton. E efecto di e cancion aki riba mi curpa hormonal y den pleno pubertad boso no ta imagina. Sin duda un di e cancionnan cu ta defini e genero. Pa algun motibo of otro e cancion aki no ta obtenibel riba Spotify, cual ta e plataforma cu ami mastanto ta uza pa scucha musica (frustrante). Anto menor, pero no menor di edad, ban ta claro di biaha cu esey.
Hector El Father, Wisin & Yandel- El Teléfono (2006)
Okay, okay. E cancion aki a sali un tempo hopi ironico. Mi tabata tin 15 aña y tabata trahando den weekend na Hospital Deli y constant e cancion tabata na radio. E ironia ta cu mi tabata tin un “amigo” y Pa a prohibi mi total di wak e (danki Pa, di berdad). Pero djis imagina con e kimiconan den mi curpa tabata reacciona ora cu mi tabata scucha e cancion aki. Pa ta claro no tabata tin niun “amor por el telefono si”. Un mensahe di texto tabata kico 15 cen? Mi tabata traha, pero toch. Ademas e tecnologia no tabata manera awo. Dios bendiciona e mayornan di tempo presente cu conocemento tecnologico y hopi pasenshi. E mama beer den mi lo ta super paranoid.
R.K.M. & Ken-Y- Down (2006)
Boso ta corda e cancion cu mi a bisa cu mi a lubida? Awel con mi por laga afo un di e cancion cu mas tabata tin influencia riba mi? Definitivamente un di e reggaetonnan mas romantico riba e lista aki cu mi ta tribi di bisa cu a defini mi hubentud. Okay, kisas e ta zona manera un exageracion, pero pa un persona romantico manera ami (por lo menos e tempo ey anto), e cancion aki a sali na e momento cu mas mi curason di adolescente tabata mester di dje. 20 zomer pasa mi tabata tin e cancion aki riba un ripiticion. Nunca subestima e impacto di puppy love. Di tanto ripiti e cancion aki, mi sabie completamente for di mi cabes, tanto e pida di R.K.M. y Ken-Y. E duo mas romantico di e genero di berdad a duna nos un temazo cu te dia di awe nos ta canta.
Don Omar – Dile (2003)
Ay no, mi curason hoben ainda ta anhela pa bay un concierto di Don Omar. Anto awo cu e ta bezig cu su tour mi cerebro ya desaroya ta bisa mi cu nos por djis scuch’e na cas. Ora cu mi a cuminsa traha e lista aki mi tabata sa cu mi mester agrega un cancion di Don Omar, pero e tabata dificil pa scoge. Na final mi a scoge ‘Dile’ pa su letranan, su melodia y e emocion di hiba mi bek na e epoca cu mi no a ni haya mi menarquia.
Chris & Angel – Ven Bailalo (2005)
Sin duda e cancion di zomer di 2005 (algun lo bisa ta ‘La Tortura’ of ‘Candyshop’ pero no pa mi, aunke cu ambos ta bon). Tin dos version di e cancion aki, e reggaeton y e version bachata. Ami gusta tur dos, pero tin preferencia pa e reggaeton, claro. Mi a scucha e cancion aki asina hopi durante vakantie di zomer cu ora mi mama a baha mi e prome dia di scol e tabata djis toca naturalmente den mi cabes (no tabata mester di iPod). Dus si, mi a baha feliz cu mi Converse blauw berde na pia y mi jeans di Donna contemplando riba un zomer dushi y tabata cla pa cuminsa scol bek. E hecho cu mi a baha feliz ta bisa hopi, pasobra un aña prome mi no kier a baha for di auto.
Eloy, Randy Nota Loca- Fuera Del Planeta (2007)
Kisas algun lo pensa cu mi ta un poco loco pa pone e cancion aki riba otro cancionnan mas popular y gusta di e genero. Honestamente, ora mi pensa riba un cancion di e genero di reggaeton cu por haci chispa den mi curpa, e lo ta definitivamente esaki. Sinembargo, e pida di “hago lo que sea por la ropa quitarte”, no ta sirbi (mas) pa mi. Mi no gusta con e ta zona. Boso sa con mi ta cu e cosnan ey. E cancion aki ta trece demasiado recuerdo, un tiki dushi, un tiki amargo. Mi ta pensa riba mi transicion di mavo pa havo. E contraste di un espacio sigur, pa un espacio cu demasiado caranan y cambionan. Mi mester a inclui e cancion aki, pasobra na 2008 mi a conoce e amiganan cu ainda ta den mi curason y nos tabata pasa nos tempo ta papia di cancionnan nobo en bes di skirbi anotacion den les di historia. Entre otro ‘Fuera Del Planeta’. Mi amiganan a pone mi sinti sigur, semper. Pa un introvert asocial y antipatico manera mi esey tabata nifica hopi.
Pensamentonan final/ conclusion
En fin. E articulo aki ta p’e amantenan di reggeaton y nostalgia. Un genero cu tempo a bira mas acepta, pero cu semper lo keda desprecia door di algun hende. Logico, pasobra ni maske con varia mi ta kere cu mi amor pa musica ta, toch tin algun genero cu hamas mi lo por scucha.
Reggaeton a bay transformando, pero un cos ta claro e letranan a keda sexual. Mi ta bisa sexual y no sexualisa, pasobra ta nos mente ta pone significado na cada cos. Sigur, tin algun cancion cu e letranan por ta fuerte pero esey tin den tur genero. Bay scucha ‘Rock You Like a Hurricane’ di Scorpions, anto esey ta un ehempel di e mil ehempelnan. Ami no ta hay’e nada malo cu cancionnan ta papia di sex. E ta e cos mas natural di mundo, tanten cu tin consentimento. Awo, no ta tur cancion ta pasa e “vibe check” pero esey ta un combersacion pa otro biaha.
Un desaroyo cu ami no gusta y cu ami personalmente ta haya laaf ta e normalisacion di uzo di droga den reggaetonnan mas moderno. A menos cu mi no ta paga tino mes bon cu ami ta pensa y no a ripara cu nan tabata canta di esey na e mesun volumen cu den presente.
Mi kier a gradici e persona cu a duna mi e reto di skirbi e articulo aki. Aunke nos ta leu, musica semper lo trece nos curason cerca di otro. Mi spera cu bo no rabia cu ‘Rakata’ of ‘Baila Morena’ no ta den e lista aki.
Spotify link pa mi playlist di reggaeton di 2000-2010:
Di cua genero mi lo mester skirbi despues? Ami ta scucha casi tur cos. Sorprende mi.
Cu amor,
Jammita
Rock music di 2000 pa 2010. Por ta punk, metal, pop, nu-metal.
Deal!