Varios luna atras un di mi miho amiganan a purba persuadi mi pa wak e serie limita ‘Delirio’ riba Netflix. E serie aki a sali durante zomer y ta consisti di 8 episodio di masomenos 45 minuut. Anteriormente mi a wak e propaganda di e serie, pero a scoge pa no wak e. Pa fin di juli mi amiga a bisa pa mi wak e y cu e ta convenci cu mi lo gust’e. Mucho mi amiga no a conta mi di e storia. El a bisa mi cu e ta trata di salud mental, trauma generacional y erotismo. E ora ey mi a cuminsa compronde pakico mi amiga a recomenda mi e serie. E conoce mi suficiente bon pa sa cu esey nan ta temanan cu sigur ta hala mi atencion.

Acaso bo no a wak e serie ainda (y bo lo kier wak e), mi ta recomenda bo pa para cu e lesamento di e articulo aki, pasobra bo sa bon bon cu nada di loke mi ta skirbi ta “spoiler free”.

Algun informacion innecesario

Mirando cu algun tempo a pasa prome cu mi a dicidi di bay wak e serie, mi a te hasta lubida di loke tabata spera mi. Mi ta djis corda cu mi amiga a bisa mi cu e ta bon. Den augustus mi a wak un episodio y a lag’e na mita. No pasobra mi no a gust’e, pero pa motibo cu mi a ripara lihe cu mi mester pone hopi atencion na e detayenan. E no ta un di e “sitcoms” kens cu mi ta wak mientras mi ta laba co’i kibra of haci mi makeup. 

Mi Prome Impresion

Apesar cu e storia ta un poco slow, e ta gara bo atencion. Mi a cuminsa slow, pero a termina e serie den dos dia. Basta lihe toch pa un serie cu topiconan cu ta dificil pa guli. E serie no a pone mi deliria, pero si a duna mi ansiedad. E serie no ta conta den forma cronologico, e ta keda bay den pasado y despues ta bin bek den presente. E ta basta facil pa sigui, pero p’esey e no ta un serie cu bo por wak y ta haci otro cos pareu, pasobra bo lo perde detayenan importante.

Pa esnan cu no sa ‘Delirio’ ta un novela di Laura Restrepo, un escritora Colombiano. Durante e serie mi a haya mi ta desea di por lesa e pensamento di e personahenan. Mi kier bay mas profundo di nan pensamento y sentimentonan pa asina mi compronde nan miho. Delirio ta significa ora cu un persona ta den un estado di confusion y cu poco capacidad pa corda tur cos.

E elenco tabata tin varios cara conoci cu mi a yega di wak den otro serienan. Mi ta imagina cu mi amiga lo a pensa cu mi lo bira feliz di wak Juan Pablo Urrego. Mi ta confirma cu si mi tabata contento di wak e den un serie, pero tambe di wak Juan Pablo Raba (si, Orestes di ‘Mi Gorda Bella y Narcos’) y e talentoso Estefania Piñares.

Mi a gusta cu e storia tabata hunga den decada 80, pero na e vestuarionan y decor e ta sinti si manera decada 70. Mi a keda encanta cu e banda sonora, especialmente cu e ultimo cancion ‘Dulcito e Coco’ di Vicente Garcia, pero tambe ‘Soy una Nube’ di Elia y Elizabeth.

Un Storia Rico

Na prome instante mi lo pensa cu mi amiga lo kere cu mi lo gusta e storia pa e escenanan erotico (aunke nan no tabata mes hopi manera mi a anticipa), pa e tarot (aunke ami no ta kere den wega di carta) of pa Midas, pero no. En general e storia tabata rico (si easy ta un bon palabra) na dinamismo toxico di famia y curason(nan) kibra. Delirio ta conta un storia di amor prohibi, literalmente loke Selena ta canta. Un banda bo tin e mucha homber cu ta bin di un cas humilde y di otro banda bo tin e mucha muhe di clase halto. E prome biaha cu e mirada entre Agustina y Midas a topa otro nan a sinti e chispanan, pero destino a dicidi otro. 

Sanger ta mas Diki cu awa?

Den e serie Agustina ta bisti un handschoen ora cu e tin ansiedad, esaki ta actua manera un escudo di proteccion p’e (especialmente contra e insectonan cu e tabata deliria cu nan). E topico di salud mental ta visibel continuamente durante e serie, mi por bisa di comienso te fin, pero tambe e “pakico”. E audiencia por considera e interaccionnan entre mama di Agustina y e yiunan como uno negativo, incluso abusivo. Tata similarmente tambe a contribui activamente na e empeoramento di e laso familiar. Agustina su ruman homber, Bichi, ta homosexual, pero aceptacion di banda di mama y tata hamas e lo a haya y a escoge pa bay biba cerca su tanta. Danki na e tanta e muchanan toch tabata tin un luga sigur y un persona di confiansa den ken nan por a acudi. Ironicamente tata tabata tin atraccion sexual pa su mesun sexo, dus e tabata proyectando riba su yiu (mi ta spera cu ta esey so). 

Fruta Prohibi

Manera boso por imagina e amor entre Agustina y Midas no a dura. No pasobra nan no ta stima otro, si no e presion di e sociedad (e mama) lo influencia Agustina su pensamento. Apesar cu Midas tabata haciendo e miho cu e por pa yega na e nivel cu e mayornan di Agustina tabata kier, nunca e lo ta suficiente pa nan. Eventualmente Agustina ta haci caso na su mama cortando e liña cu tabata conecta e cu Midas. E liña invisibel a keda, pero nan fruta ya no tabata existi. 

Pensamento Final

Mi ta skirbiendo e storia aki casi dos luna despues di a termina e serie. Mi ta purbando di corda e temanan mas importante di e serie. En general mi ta recomenda ‘Delirio’. E ta conta un storia di heridanan di trauma familiar, e consecuencianan pa salud mental y aceptacion. Mi a keda namora di e ultimo episodio caminda Agustina ta enfrenta su mayornan, anto dilanti di tur hende. Agustina a desenmascara e fachada di su mayornan cu tabata pretende cu nan tabata un famia perfecto y a kibra e “bubble” cu nan ta biba aden. Despues di esaki e no a bira cara atras mas. Na final Agustina a acepta loke a pas’e, cual pa un persona di un personalidad “berraco”, no ta facil. Agustina a acepta cu e tin un esposo amoroso y atento cu semper lo cuid’e y proteh’e y esey tabata suficiente.

Shonnan, esaki ta mi pensamentonan di e serie ‘Delirio’. Abo a wak e caba? Kico bo a pensa di dje? Mi articulo a haci bo curioso pa wak e? Ami kier lesa e buki awo.

Cu amor,

Jammita