Desde cu mi tabata un mucha

Mi a mira mi tata lucha.

Tur soda, cansa y sushi.

“Caramba!”, e homber ey tin curashi.

Den su uniform blauw e ta subi trapi y echa baina bay ariba.

Di chikito semper e tabata un bon pida.

E parce yiu di e solo cayente

Yen energia y cu un mente briyante.

Den su pickup blanco cu trapi patras.

Cu yen di anticipacion y alegria nos ta warda atardi, pura pa e bin cas.

Si, bo ta Alex grandi y semper bo t’ey pa mi.

Den e trabou di tata semper pa a sa di cumpli.

Pa, mi no kier pa bo traha duro.

Pero mi sa cu bo intencion y motivacion ta puro.

Aunke bo por ta fastioso.

Bo ta un humano precioso.

Cu bo metafoornan bo a siña mi kico a bida.

Pa, bo ta e prome homber cu mi a stima.

Awe ta dia internacional di hende homber. Pa algun tempo mi tabata tin e concepto aki den mi cabes pa skirbi. Un storia dedica na hende homber. Especialmente hende hombernan di e clase trabahoso, hende hombernan manera mi tata. Algun di boso cu conoce mi sa cu mi no ta gusta skirbi poema. Mi gusta skirbi storia, pero awe mi ta duna mi mes e reto di skirbi un poema pa mi dedica specialmente na mi tata stima.

Como sociedad e ta importante pa para keto ariba kico e ta nifica pa ta un hende homber. Nos ta den 2024 y mi gran deseo ta pa tin suficiente espacio pa hende hombernan por bay pa por papia di nan sentimentonan y nan emocionnan. Pa asegura cada hende homber cu ta okay pa yora y ta vulnerabel. Ta okay pa papia di cosnan dificil. Feliz dia pa tur hende homber, awe, y tur dia.