Mi a gusta e cuenta aki di skirbi reflexion riba diadomingo. E ta pone mi sinti liber.

Pegapega y Cabayito

Carnaval oficialmente a termina y mi no a bay wak niun parada. Otro aña mi lo purba bek. Mi tin cu bisa si cu e aña aki, despues di hopi tempo, mi tabata asina inverti den cancionnan di Carnaval. Mi ta kere un cos a keda bon claro e Carnaval aki: nos tur gusta canticanan di bestia. Despues di e prefinal hopi hende tabata tin expectativanan halto pa Born in Soca, pero Ride it Up cu su ritmo contagioso a exigi su luga y atencion mereci. Na final di Carnaval ta pegapega cu cabay a manda. Meymey di nan tambe tabata tin otro canticanan cu ami a haya leuk manera: Full Gas, Let D Bassman Cook, Six Seven (yeah, for real), Energy y Toro Loco (otro cantica di bestia mas).

Djis un Otro Meme

Papiando di bestia, siman pasa mi a ripara cu tin un trend pasando riba internet (bo sa exactamente unda mi ta bayendo cu e cos aki). Cada biaha cu mi subi Facebook mi tabata topa cu memenan di hendenan cu cabes di bestia genera pa Inteligencia Artificial (IA). Den e memenan mi a lesa e palabra “Therians”. Mi a nota cu e postnan tabata mas tanto na Spaño. Mi no a worry pa bay busca kico nan kiermen, aunke cu nan a haci mi curioso.

E siman aki mi tata a puntra mi ta kico ful e cos di “Therians” ta na harimento. Su pregunta a sorprende mi. Esey kiermen cu e meme pa un motibo of otro ta den mi tata su algoritmo tambe. Mi a cuminsa hari y mi a bis’e cu mi no sa, pero cu mi tambe a wak algun post di nan. Mi mama cu no tabata sinta mucho leu di nos a bisa cu e hendenan di awendia ta traha yen cos straño y cu e no sa kico ta pasa door di nan cabes. Mas mi a sigui hari.

Nada Nobo

Mas laat den siman mi a topa un articulo splicando e fenomeno. E no ta algo nobo, djis un hende a dicidi di traha un meme y el a bay viral. Basicamente e ta ora cu personanan ta identifica como un bestia a base involuntario y no e no ta mescos cu “Furries”. Na final di e siman aki mi a wak varios post bisando cu e hendenan cu ta identifica como “Therians” tin un of otro tipo di psicopatologia. Esaki no a sorprende mi. Algun di nos, como hende, tin e tendencia di stempel cualkier comportacion cu pa nos ta mustra straño, for di luga of inusual cu un trastorno.

E postnan cu mas mi a gusta ta esunnan bisando pa no gasta energia odiando “Therians”, pero pa pone presion pa divulgacion di ful e documentonan di Epstein y exigiendo pa haci tur cu a comete actonan ilegal y inmoral responsabel pa nan actonan.

E Macaco cu tin tur Hende Yorando

Storianan di bestia no ta caba. Ayera tardi mi ruman ta conta mi e storia di un macaco chikito cu yama Punch. E tabata contando mi di dje asumiendo cu ya mi a wak cos di Punch online, pero no. Wel, si, mi a wak den mi “feed” videonan di un macaco pasa mi voorbij, pero mi no a wak nan.

Apego sigur

El a splica mi cu mama y tata di Punch a rechas’e ora cu e tabata un baby. Door di e rechazo aki a opta pa pone Punch den un zoologico Hapones p’e biba cu otro macaconan, pero te hasta ey nan Punch a ricibi rechazo. Esaki a causa ansiedad den e macaco chikito y e wardadonan di e parke a opta pa dun’e un peluche. Cada biaha cu Punch tabata haya rechaso e tabata core bay cerca su peluche.

Mi prome pensamento a bay riba e experimento di Harlow den decada 50 di e siglo anterior. E investigacion antiguo aki a demostra cu e macaconan no por biba solamente di nutricion, pero cu nan mester di amor, cariño y calor tambe pa prometo crea un laso y apego sigur. Despues cu e macaconan caba di come riba un figura traha di hero nan tabata core bay cerca e figura traha di paña.

Unda e Amor ta?

Punch ta mustra despues di tur e decadanan nada no cambia. Nos tur mester di amor pa sobrevivi. Cual ta pone mi pensa, dicon ainda nos como humano no ta dunando nos yiunan e amor y conexion cu nos yiunan mester? Algun di nos ta haciendo nos best y ta dunando tur loke cu nos tin. Mi sa cu nos no por duna di un copi bashi, pero mi ta sinti incomodo cu e pensamento cu tin mayornan ta hay’e okay y cu a normalisa cu un screen por haci e trabou cu principalmente nan mester haci.

Un screen no por duna bo yiu un brasa, e no por bis’e autenticamente cu e ta stim’e (IA ta conexion artificial, dus no bisa mi cu Alexa, Siri, Chat, etc, por). Mi no ta husgando tampoco, djis cuestionando e sistema hodido aki cu ta spera cu e tiki tempo cu nos tin ta resta pa nos tin suficiente energia pa por ta un mayor (cu tur e expectativanan di afo). Un sistema cu kier exigi pa nos haya yiu pa nan por cobra pensioen despues (eye-rolling).

Palestina liber!

Ayera nochi mi ta pensa cu Punch t’e evidencia cu nos no a perde nos humanidad y tampoco empatia, pero si cu e empatia aki ta selectivo. Rafah y tur e hendenan cu ta bibando ey nan no t’ey mas. Apesar cu varios hende rond di mi tabata sigui noticia y ta consciente cu e “presidente di paz” no a termina niun guera y hende a sigui muri na Gaza, mi tabata desea cu tur e echonan desastroso cometi contra e pueblo di Gaza door di Israel por a bay viral tambe manera Punch y e meme di Therians.

Un Bubble di Privilegio

Mientras tanto e “presidente di paz” ta cabando cu Cuba tambe y ami ta djis puntra mi mes con e resto di 2026 lo ta. Mi no kier ta negativo riba un diadomingo, pero mi ta wak tur e cosnan cu ta pasando rond di mundo. No ta keda mi nada cu ta agradecido pa tur loke cu tin y realisa e priviligio cu algun di nos tin di ta bibando riba nos dushi pida baranca; Aruba.

Cu kico abo ta agradecido awe?

Cu amor,

-Jammita