Diadomingo; un otro fin di siman of un otro comienso di siman? Depende con bo kier mir’e. Aunke mi mama ta bisa cu e siman nobo semper ta cuminsa riba un diadomingo.

Floho te cu mi ta Hole

Awe mi a haci cos di floho y a lanta te laat. Loke cu a motiva mi pa lanta ta ora cu mi a corda riba e dos cos dushi cu mi a cumpra ayera na un panaderia cerca di wela su cas. Un ta di guyaba y e otro di caramel. Mi a lanta mesora y mi a bay haci webo gebrouw. Mi a keinta e dos cos dushi y mi a hasa tres pida speki te ora nan ta bon kima. Si nan no ta kima mi no ta come nan. Despise mi a pidi mi casa pa traha koffie. Loke a pone mi lanta den un rato di ora for di cama a resulta di ta un desapunto. E guyaba tabata smaak marga y e mansa tabata falta sabor. E caramel tabata okay.

Un Canica di Koffie

E koffie cu mi casa a traha sinembargo tabata smaak manera di un cafeteria y tabata djis koffie instantaneo. El a sirbi mi koffie pa dos dia, pero no ta nada. El a baha bon y mi ta kere cu mi lo skip lunch awe. Na e fondo di e copi, of miho bisa copi di sopi, mi tabata purba di wak kico e scuma cu a keda atras ta bisa mi. Mescos cu mi mama y tata sa haci atardi despues cu nan dal nan koffie.

E foam blanco combina cu maron cla y scur tabata resalta den e copi grandi cu mi casa a yega di cumpra pa mi algun aña atras. Mi a gusta e copi pasobra e tin yen di baca preto cu blanco den un paisahe berde cu solamente mi a yega di mira den e poco biahanan cu mi a dicidi di coy un trein pa bay un otro stad tempo cu mi tabata biba na Hulanda.

Down the Rabbit Hole

E mesun paisahenan cu un tempo tabata pone mi sinti tur cos menos goso, pero cu ironicamente mi a bin ta anhela despues cu mi a bin biba bek na Aruba, a haci cu mi a gusta e copi asina hopi. E scuma no tabata bisa mi nada. Mi a purba bira e copi pa wak si di otro angulo mi por mira algo, pero nada. Wel, un plek tabata parce mi Paquito despues cu el a caba di come y ainda e ta bin pa pidi mas cuminda. Mi a bolter e copi pa wak si mi ta mira sikiera un poco simbolismo pa duna mi speransa despues cu mi a pasa algun ora ta busca mas informacion di e Epstein files mainta ora cu mi tabata “doom scrolling” riba mi telefon.  

Perspectiva of Maletanan Diferente

Mi ta pensa cu un persona por duna simbolismo na tur cos. Esaki ta depende di kico e mes kier wak algo y si e ta dispuesto pa wak e. Un persona su tas invisibel cu e ta carga riba su lomba, sea yena cu amor, pasion, tristeza, dolor, trauma, etc. tur ta influencia un persona su perspectiva. Ora cu mi a bira e copi boca bou, mi tabata convenci cu mi kier a sinta awe diadomingo pa skirbi un reflexion. Skirbi, pa haci mi schoudernan menor pisa, mi curason contento y mi cabes bashi. Si bo ta curioso pa sa kico mi a mira den e copi ora cu mi a bir’e boca abou ta un sero, E ora mi a dicidi di skirbi tocante e cosnan cu ami ta haya cu a bay bon e siman aki of cu a resalta.

Na Mita Caminda

Pa cuminsa, por fin mi a haya mi ultimo cifra pa semester 1. Mi a logra haal tur cos den un solo biaha. Especialmente e ultimo cifra mi tabata pura pa haya, pasobra esey ta un examen cu hamas mi lo kier haci di nobo. Un dushi materia, pero un examen final cu a hera corta mi rosea. Mi ta hopi orguyoso di mi mes. Nunca mi a yega di traha asina duro na scol. Universidad di Aruba tin un manera di obliga bo traha y soda pa bo puntonan y mi gusta easy. E sufrimiento ta bale la pena. 

Mi Prome y Ultimo Parada?

Papiando di sufrimento, e siman aki mi a confirma cu ami hamas lo por bay den carnaval. Especialmente carnaval den dia. Serio, respet na tur cu ta bay parada, tras di otro, anto den higra di solo y tin ora cu hilchi. Mi no sa con boso por. E aña aki mi a dicidi di bay parada escolar en bes di keda traha na scol.

Aña pasa mi a keda scol y no cu e tabata laaf, pero mi a pensa pakico keda traha ocho ora na scol mientras mi por djis bay parada e aña aki pa tres ora y bay cas despues. Wel, banda di ex Fergus Place ya mi a cuminsa cuestiona mi logica. Riba dje mi a bay cu mi cabey habri, un sombre grandi ideal cu mi a fia pero cu tabata cayente pa bula bay y sin un gota di awa cu mi. Mi no a bay prepara y e capa di cinco centimeter di proteccion solar cu mi a smeer riba mi curpa mainta a practicamente disparce dilanti di Home Sweet Home. Ken ta manda hende?

Are we There yet?

Banda di Banco di Caribe mi a cuminsa calcula cuanto falta pa yega Plaza Betico y tabata falta hopi ainda. E cos a cuminsa sinti pio ora cu mi a wak cuanto hende tin para na banda. Mi a pensa den mi mes: “e hendenan aki no tin trabou of cos di haci?” Un alivio ora cu mi a cuminsa chupa riba frio tiña cu sucu en bes di esun di awa. Mi a manda manera cinco abou. E bon ta cu mi a scucha “Ride it Up” dos biaha, pasobra e otro canticanan di Groove Masters ta asina slow y monotono cu mi a djis cana un dado momento den tur nan toca. E ta leuk pa un rato, pero banda di Van Dorp caba mi kier a pusha e truck pa nan sigui. Mi no a anticipa cu tur cos lo cana asina pocopoco.

Ta ami of ta mi Attention Span?

Mi a puntra coleganan rond di mi si ta asina e ta sinti pa bay den parada. Nan a bisa mi cu e banda aki ta riba e tono aki nan ta keda, anto cu cos por keda pega pa un bon rato. E malo di esey ta cu e ora bo ta cuminsa sinti e solo ta kima riba bo cuero. E tabata sinti manera na MAVO ora nos tabata pone e loep riba nos cuero den e solo cayente te ora cu nos cuero cuminsa pica, djis e biaha aki tabata puro solo, noun loep necesario. Ami honestamente a kere mi lo sali ta hole galina hasa di e luga ey, pero no, solamente proteccion solar di baby (mi tabata spuit mi curpa cada 20 minuut). Mi lo bay bek otro aña? Probablemente cu si, djis mi lo bay miho prepara.

Es Hoy! Es Hoy!

Shonnan, ami no sa di boso pero mi ta wardando riba e diadomingo aki desde september di aña pasa y no djis ami, henter mundo. Expectativanan ta halto y mi sa cu Benito no ta bay laga mi desapunta manera e pan di guyaba cu mi a come awe mainta. 

Abo ta bay wak Super bowl? Ami probablemente lo wak e na cas.

Kico tabata e cosnan cu a resalta e siman aki pa bo? Si nos no para keto un rato y pensa, nos lo no ripara e bendicionnan di tur dia. 

Un pregunta na boso. Kico boso ta prefera? Ora cu mi skirbi na Papiamento of na Ingles? Ami normalmente ta skirbi den e idioma cu mi curason ta instrui mi, cual ta un variacion di e dos idiomanan ey. Ami ta gusta e combinacion. Laga mi sa kico boso ta prefera.

P.s. mi curason a kibra ayera ora mi a lesa cu Brad Arnold di 3 Doors Down a fayece. Su concierto lo keda den mi bucket list pa semper.