Luna di september ta casi bay laga nos. Mañan oficialmente herfst ta cuminsa.

Temporada di herfst

Tempo cu mi tabata biba na Hulanda mi tabata gusta wak e blachinan di mata cambia di colo. E temporada aki, mescos cu lente, ta duna bo un sensacion manera cu bo ta pasando den un transicion y cu tin cambio na caminda. Herfst tabata sinti dushi pero amargo na mesun momento. Herfst ta nifica cu mi a caba di yega di cas, sin un fecha pa bay bek. Herfst ta nifica cu tur cos ta bay ta muha pa e siguiente simannan. Ya pa september poco poco e dianan ta cuminsa sinti mas cortico. E scuridad ta cuminsa core bo tras y bo mente ta cuminsa lubida tur e sonrisanan den e awa blauw cla y cayente di Aruba. Mi mente tabata bay den modo masokista te ora cu e flornan cuminsa sali bek pa fin di maart.

Un ilusion falso

Mirando bek e temporadanan ey tabata sinti eterno, pero e realidad ta cu cinco herfts so mi a experencia den mi bida. Tin hende ta bisa cu tempo ta un construccion social, un concepto y invencion colectivo pa yuda sociedad. Cuanto biaha nos a haya nos mes ta bisa: “e dianan ta bula” of “undjis ya ta fin di aña”. Tempo no ta pasando mas lihe, pero e por sinti asina. Tin un splicacion astronomico su tras, pero ami no ta bay “deepdive” den esey.

E ta sinti manera asina hopi cos ta pasando pareu y e mundo ta sigui draai sin para. Nos por gradici e aparato den nos mannan pa esey. Si, esun cu nos no por biba sin dje. Di un banda mi kier pa e tempo pasa lihe, especialmente ora mi ta na trabou. Di otro banda mi kier pa e tempo keda pega. Ora cu mi ta cu famia mi no kier pa e tempo pasa. Mi ta probecha cada sonrisa, aprecia cada combersacion y disfruta di cada cuminda cu nos ta come den famia, especialmente diadomingo.

Hiba mi bek of para two

Ora mi tabata tin 17 aña, mi tata a bisa mi cu tempo ta pasa hopi lihe. Den mi mente mi a pensa: e no ta pasa lihe suficiente. E ta comun pa un adolescente sinti manera e kier “speed up” tur cos y kier crece pa caba. E tempo ey mi no a compronde kico mi tata kiermen. Awo cu mi ta casi yega edad mediano e palabranan di mi tata ta persigui mi.

Cada biaha cu mi ta den compania di mi sernan keri, mi ta pensa riba e palabranan di mi tata, mi ta pensa riba nos combersacion e atarei ey na 2009. E tabata e prome combersacion cu mi tata a tene cu mi sin cu e mester a zundra, halsa bos, grita. Wak con efectivo e ta ora bo ta tuma tempo y papia cu bo yiunan? Si, mi ta papiando cu boso “Gentle parenting haters.”

E tempo ta AWO!

Apesar cu e tabata un bon combersacion, mi ta sinti e peso di e palabranan di mi tata cada di cu pasa y awo mas cu nunca. Cada biaha cu mi wak mi welanan, mi mayornan, mi rumannan, mi casa (please no kibra cabes pakico mi a pone nan den e secuencia ey, “it’s not that deep”) mi no por keda sin pensa cu un dia mi lo wak nan pa ultimo biaha (a menos cu ami muri prome, LOL). Mi sa cu e dia lo yega cu mi lo brasa nan y hole nan pa ultimo biaha.

Apesar cu mi a bin ta preparando mi curason pa e perdidanan di mi hendenan, mi no kier p’e dia yega nunca. Ami ta sigur cu no ta ami șo ta tortura mi mes cu e pensamentonan aki. Atrobe tempo tin nos man yen tur ora cu nos ta lubida di sinti y lubies pakico nos ta aki na prome luga. E no tin sentido pa bringa tempo, pero si e tin sentido pa balora y stima e personanan cu t’ey pa nos (incondicionalmente). Abo ta bay probecha di tempo of bo ta bay biba cu arepentimento?